PARTY o LAMAY?

Ecclesiastes 7:2
It’s better to go to a funeral than to attend a feast; funerals remind us that we all must die.

Sabi ni Solomon, kung pipili kayo sa party dito at lamay doon, doon kayo sa lamay. Ano’ng ibig sabihin nun? Pag nagpupunta ka sa patay, naaalala mong mamamatay ka rin. Iyun ang dapat na napala mo. At pag naalala mong mamamatay ka rin, naaalala mo kung paano ka dapat mabuhay. Pinapahiram ka pa ng konting sandali para samantalahin at lasapin natin ang buhay habang hindi pa nagpapantay ang ating mga paa. Naalala nating pag-isipan ang kahulugan ng buhay, suriin ang sariling buhay at maghanda sa hindi naman maiiwasang appointment na yan.

Ang buhay ay umaabot ng pitumpung taon. Kung sobra kang malakas, baka umabot ka pa ng 80. Pag naka-90 ka pa, sobra-sobra na. Yun ngang iba, 10 years old pa lang namamatay na. Tingnan nyo ang balut, hindi na nagkaroon ng pagkakataong mabuhay, di ba? Hindi pa nga isinisilang e sumakabilang buhay na. Kanya-kanyang panahon. Pag nagkaroon tayo ng dagdag na oras, ipagpasalamat natin, “Salamat, buhay pa ako.” Hindi dapat puro reklamo.

Mayroon naman talagang tinatawag na, e ayaw pa. Siguro mayroon pang mga karanasang hindi pa natikman o mga kabutihang hindi pa nagawa. Kaya nga dapat na nabubuhay tayo araw-araw. Paborito nating sinasabi yung, “Mabuhay!” Kaya dapat na binubuhay natin ang sarili. Pag nalulungkot, humanap ng saya. Umimbento ng kaligayahan kaysa magmukmok. Lasapin ang sarap ng buhay at magmartsa nang mainam kung ga-graduate na.