ISANG REYNA LANG

Genesis 2:24
For this reason a man will leave his father and mother and be united to his wife, and they will become one flesh.

Hanggat maaari, huwag ninyong ipipisan ang inyong asawang babae sa inyong ina. Napakalaki ng nagiging problema nyan. Bakit? Dalawa kasi ang reyna, iisa ang trono.

Isang dakot na luya ang gustong ilagay ng biyenang babae sa tinola, kapiraso lang gusto ng manugang. Kung papaano bibihisan ang mga bata, kung kailan paliliguan, kung anong temperature ng tubig, pinagtatampuhan yan ng mga mag-biyenan. Higit lalong matamis ang samahan ng magbiyenan kung hindi sila nagsasama sa ilalim ng iisang bubong sapagkat talagang may isang reyna lang doon.

Kung kayo ay titira sa bahay ng inyong magulang, ang nanay ang reyna doon. Kung ang biyenan ang matira doon sa tahanan ng mag-asawa, ang manugang ang reyna doon. Huwag sasama ang loob ng mga ina sapagkat naging reyna na kayo sa inyong sariling tahanan. Bigyan na nyo ng pagkakataon ang inyong mga manugang na maging reyna rin sila. Pero ang manugang naman, manatiling sweet and respectful sa mother-in-law.

Never compare your mother with your wife. Kahit pa nga ang tinola nya ay lasang sinigang, huwag mong sasabihin, “Mabuti pa nga ang tinola ng nanay ko” o “Ang leche flan ng nanay ko ay leche flan talaga, ang leche flan mo ay parang pudding.” Tutulo ang luha ng babae at magkakaroon ng negative feeling sa biyenan, hindi man dapat.

Yung mga lalaking ayaw iwan ang kanilang nanay, huwag mag-asawa. Pero kung mag-aasawa, tanggapin nyo ang inyong mga asawa kahit parang bato ang hot cake nyang luto sapagkat yan ang kanyang kaya.