BAWAL ANG TAMAD

Proverbs 19:15

If you are lazy and sleep your time away, you will starve.

Isa sa pinakamalaking kapintasan ay ang matawag na tamad at batugan. Maging ang Dios ay masasakit na salita ang ibinabato sa mga taong tamad. At nakapanlulumong napakaraming miembro ng ating pamilya ang tamad. Gustung-gustong magkaroon ng Nike, pero ayaw magtrabaho. Hiling nang hiling doon sa ate na nagtatrabaho bilang kasambahay sa Hong Kong. Di na naawa. Gasgas na ang kamay ng ate sa kalilinis ng kotse ng mga Tsino dun, eto namang mga kapatid at anak dito, porma nang porma sa mall. May mga teenagers na ang aarte at ang hahaba ng mga kuko, kaya ni hindi na makapagsaing. Paiba-iba pa ng kulay ng buhok. Hindi na marunong mahabag dun sa nagpapakahirap magtrabaho. Laging naiinggit sa iba at naghihimutok. Yung iba, wala na ngang hanapbuhay, miserable na, nagda-drugs pa!

Dapat tinutulungan natin ang mga kumikita, hindi yung gasta na lang nang gasta ng pinaghirapan nila. Hindi pa nga alam kung kailan darating ang remittance, naipangako na sa Bumbay! Ipambabayad lang sa mga kung ano’ng luho yung kikitain pa lang ng mga taong nagpapakaalipin kung saan-saan.

Kung gusto nating magpasasa, gusto nyong pumorma, gumawa kayo ng paraan. Magtrabaho kayo. Magnegosyo kayo. Kayong mga kabataan, bumili kayo ng isang kahong Chocnut sa umaga, itinda nyo sa school, sa hapon may tubo na kayo. Hindi yung puro paggasta na lang ang iniisip.

Malaking kasalanan ang katamaran. Hindi kinukunsinti ng Dios ang mga tamad. Nakakasira yan sa lipunan, sa buhay, at siempre, sa sarili.